Ao longo deste ano e medio traballando neste blog, as 751 entradas publicadas até agora déronme a oportunidade de comezar un proceso de desaprendizaxe como orientador.
O meu contorno persoal de (des)aprendizaxe (PLE) naceu dos blogs e continúa alimentándose deles. Blogs que eu entendo como espazos de información e que na maior parte deles, comparten contido dun xeito desinteresado, non se preocupan polo tráfico que xeran, os premios que reciben ou polo recoñecemento nas redes sociais que acadan. Comparten pensando en gañar gañar.
A seguinte parada no camiño da constitución do meu PLE foi achegarse ás redes sociais. Primeiro Twitter, transitando polas pontes romanas de recente creación. Máis tarde Google Plus, Pinterest e finalmente Facebook.
E todo isto para?
O obxectivo desta entrada non é outro que o de compartir o meu PLE. Logo de probar diferentes lectores RSS, quédome con digg reader. É gratuíto e sen opcións premium, permíteme importar arquivos OPML e vincular a miña conta de Twitter.
O seguinte arquivo OPML recompila os máis de 440 blogs que sigo na actualidade a través da blogosfera. Só tes que importalo a un lector RSS e comezar a experimentar co teu PLE.
O meu agradecemento a todas e a todos aqueles que comparten pensando en gañar gañar.