SINC
Dolors Girbau, profesora de Psicoloxía Básica da Universidad Jaume I
(UJI), desenvolveu un novo marcador clínico en lingua castelá para diagnosticar
o trastorno específico da linguaxe, que afecta a entre o 6% e o 7% dos nenos
menores de sete anos. A investigación coa que se validou este novo
procedemento para nenos de entre oito e dez anos publícase na revista First
Language.
O trastorno específico da linguaxe (TEL) incide nas capacidades orais dos
nenos, tanto desde o punto de vista expresivo –vocabulario limitado, estruturas
morfosintácticas simples ou erróneas– como de comprensión. Ademais, adoita ir
acompañado dun déficit de memoria a curto prazo. "É fundamental detectar
canto antes mellor esta patoloxía con obxecto de pór en marcha tratamentos
adecuados, para o que tamén deben descartarse, en primeiro lugar, posibles
déficits de audición e da capacidade intelectual", apunta Girbau.
O traballo consistiu no deseño dun tipo de test, denominado Non-word
Repetition Task (NRT), que se realizou a 40 nenos de Castelló, 20 deles como
control.
"O traballo de campo consistía en presentar un modelo de palabras
ficticias con características especiais –diferente número de sílabas ou
combinación diversa de fonemas, entre outros– a unha mostra infantil, que tiña
que repetir cada pseudopalabra", afirma a profesora. Os participantes
infantís con TEL de 8 a 10 anos obtiveron unha porcentaxe significativamente
inferior de pseudopalabras repetidas correctamente respecto dos controis de
igual idade; os erros incrementábanse a medida que aumentaba o número de
sílabas da pseudopalabra.
A ambos os grupos de estudantes de primaria administróuselles unha
exhaustiva batería de tests psicolingüísticos, ademais dun test de intelixencia
e audiometrías.
O mesmo grupo de investigación publicou, con anterioridade, outros datos
sobre NRT en mostras infantís hispanofalantes de Nova York, obtendo resultados
similares. O estudo realizouse en colaboración co catedrático Richard G.
Schwartz do Centro de Posgrao da Universidade City de Nova York.
Repetición de pseudopalabras
Estes estudos, en palabras de Dolors Girbau, "demostran as limitacións
na memoria de traballo a curto prazo que adoita mostrar a poboación con TEL en
varias linguas, co que se presenta un novo marcador clínico en lingua castelá.
Esta tarefa de repetición de pseudopalabras "axudará tamén a mellorar o
diagnóstico de TEL na poboación hispanofalante", engade.
Girbau tamén deu a coñecer resultados sobre outros marcadores clínicos de
TEL, incluíndo estudos de resonancia magnética que demostraron un menor volume
de materia gris ou branca en áreas cerebrais relacionadas coa linguaxe oral ou
a lectura.
Na actualidade, ela e o seu equipo están a traballar en estudos de
resonancia magnética funcional e potenciais evocados, que permitirán seguir
avanzando no coñecemento das bases neurocognitivas do TEL. Con estes datos,
espérase poder mellorar o diagnóstico e tratamento desta patoloxía da linguaxe
oral, que ás veces acaba afectando á lectura.
Referencia bibliográfica:
Girbau Massana, Dolors. “The Non-word Repetition Task as a clinical marker
of Specific Language Impairment in Spanish-speaking children”. First
Language (2016). v. 36, n. 1, pp. 30-49. DOI: 10.1177/0142723715626069